Mɛɛ Chiisu yiŋ , mi nyina diandaa tosa mbo kua o yondo pollo niŋ. Le palɛi 40, Chiisu di nyɛ o nyɛ le. Nduyɛ yiaaŋ ma wa ndu nɛiyo tau. Okoŋ, mi Setana huŋ tɔɔndaŋ ndu mbo dimul ndu aa: ‘Te Po Mɛlɛka kɛsɛ ŋ cho ni, mɛɛ siiŋguu wɔ poutaŋ ndaŋ beediiyo.’ Kɛ mi Chiisu soliŋ Diom Mɛlɛkaa kpeku, mbo dimul ndu aa: ‘I cho i poonyiaa maa o cho ko nyɛdiaa yɔŋaa le tosa mi wana wa yoomu le. Kɛ a nɔ ma yaŋ nilaŋ o diom o diom Chɛhowa dimi pɛ.’

Okoŋ kɔɔli, mi Setana huŋ tɔɔndaŋ vɛlɛ Chiisu mbo dimul ndu aa: ‘Te Po Mɛlɛkaa kɛsɛ ŋ cho ni, mɛɛ fulawɔ choo choo loŋ ma chicha lɛŋ. I cho i poonyiaa maa Mɛlɛka cho maalikɛiyaa nduaa yɔŋ ma huŋ saala num.’ Mi Chiisu soliŋ vɛlɛ Diom Mɛlɛkaa kpeku mbo dimul ndu aa: ‘I cho i poonyiaa maa wana tɔɔndaŋ Chɛhowa le.’

Okoŋ kɔɔli, mi Setana chɔm Chiisu masɛi kpou o chieeŋndo choo vɛlɛ a sulta ndɔlaŋ. Mbo dimul Chiisu aa: ‘Masɛi hei kpou a sulta ndɔlaŋ, I cho num ke, te o yɔŋ pɛ ma baŋ wulaŋ ma piɛi ya, o yɔŋ bɛɛ aa lepilɛ kpe.’ Kɛ mi Chiisu mulul ndu aa: ‘Hiou ma kuɛ Setana! I cho i poonyiaa maa Chɛhowa ndu pilɛ kpe ŋ nɔ ni ma piɛi.’

Okoŋ, mi Setana faŋaŋ Chiisu kɔɔli, mbo kuaŋnuŋ. Mɛɛ o kuɛŋnuŋ, mi maalikɛiya huŋ ke Chiisu nyɛdiaa. Chɔŋ niŋ a teleŋ koŋ, mi Chiisu kandu waŋnda yooŋgu kɛndɔɔ dimullo a Masale Mɛlɛkaleŋ okɔɔ. Nduyɛ le wali koŋ tosaa Mɛlɛka ndoo vem ndu o chieeŋndo choo ni. Mi waŋnda hɛnaŋ tau a nyɛ Chiisu wa nda pɛɛkoo wo, nduyɛ mi ndaa tol ndu kɔɔli ba o ba ndoo kuɛ pɛ.