တၢ်မၤလိ ၇၅
မုၣ်ကီၤလံၢ်လ့ပစီယ့ၣ်ၡူး
ဖဲယ့ၣ်ၡူးဘျၢထံဝံၤအလီၢ်ခံ ယွၤအသးစီဆှံဆှၢထီၣ်အီၤလၢ ပှၢ်မုၢ်ကနၢအပူၤလီၤ. ယ့ၣ်ၡူး တအီၣ်ဘၣ်တၢ်အီၣ်အိၣ်ဝဲအသီ ၄၀ လံအဃိ အဝဲအဲၣ်ဒိးအီၣ်တၢ်ဒိၣ်မးလီၤ. ဝံၤဒီး မုၣ်ကီၤလံၢ် ဟဲလ့ပစီယ့ၣ်ၡူးဒီး တဲဝဲလၢ– ‘နမ့မ့ၢ်ယွၤအဖိခွါန့ၣ် ဒုးကဲထီၣ်လၢၢ်တဖၣ်အံၤလၢကိၣ်တက့ၢ်.’ ဘၣ်ဆၣ် ယ့ၣ်ၡူးသူဝဲလံာ်စီဆှံအဆၢဒီး စံးဆၢက့ၤအီၤလၢ– ‘တၢ်ကွဲးအသးစံးဝဲလၢ ပှၤဟီၣ်ခိၣ်ဖိ တမူဝဲထဲလၢကိၣ်ဘၣ်. ဒ်သိးကမူအဂီၢ် ကဘၣ်ဒိကနၣ်ဝဲ ယဟိဝၤယွၤအကလုၢ်ကိးထံၣ်ဒဲးလီၤ.’
ဝံၤဒီး မုၣ်ကီၤလံၢ်လ့ပစီကဒီးယ့ၣ်ၡူးလၢ– ‘နမ့မ့ၢ်ယွၤအဖိခွါနီၢ်ကီၢ်န့ၣ် ဖုလီၤလၢတၢ်လုၢ်ဟံၣ်အဖီခိၣ်တက့ၢ်. တၢ်ကွဲးအသးစံးဝဲလၢ ကစၢ်ယွၤကဆှၢလီၤ မူခိၣ်ကလူးလၢ ကစိာ်ထီၣ်နၤအဂီၢ်လီၤ.’ ဘၣ်ဆၣ် ယ့ၣ်ၡူးသူက့ၤလံာ်စီဆှံအဆၢ ဒီးတဲဝဲလၢ– ‘တၢ်ကွဲးအသးစံးဝဲလၢ တဘၣ်မၤကွၢ် ယဟိဝၤယွၤတဂ့ၤ.’
တဘျီအံၤ မုၣ်ကီၤလံၢ်ဒုးနဲၣ်ယ့ၣ်ၡူးလၢ ကယဲၢ်ဟီၣ်ခိၣ်အတၢ်ပၢတၢ်ပြးတဖၣ်, တၢ်ထူးတၢ်တီၤ ဒီးတၢ်လၤကပီၤ ဒီးတဲဝဲလၢ– ‘နမ့ၢ်ဘါယၤထဲတဘျီန့ၣ် ယကဟ့ၣ်လီၤနၤကယဲၢ် ဟီၣ်ခိၣ် အတၢ်ပၢတၢ်ပြးတဖၣ်, တၢ်ထူးတၢ်တီၤ ဒီးတၢ်လၤကပီၤလီၤ.’ ဘၣ်ဆၣ် ယ့ၣ်ၡူးတဲဆၢက့ၤဝဲလၢ– ‘ဟးထီၣ်ကွံာ်မုၣ်ကီၤလံၢ်ဧၢ, တၢ်ကွဲးအသးစံးဝဲလၢ နကဘၣ်ဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤလီၤ.’
ဝံၤဒီး မုၣ်ကီၤလံၢ်ဟးထီၣ်ကွံာ်ဝဲလီၤ. ဒီးမူခိၣ်ကလူးတဖၣ်ဟဲလီၤဒီး ဒုးအီၣ်ယ့ၣ်ၡူးလၢတၢ်အီၣ်တၢ်အီလီၤ. ဖဲတၢ်မၤအသးတဖၣ်အံၤဝံၤအလီၢ်ခံ ယ့ၣ်ၡူးစံၣ်တဲၤတဲလီၤ ဘီမုၢ်တၢ်သးခုကစီၣ်လီၤ. ယ့ၣ်ၡူးဘၣ်တၢ်ဆှၢလီၤအီၤလၢ ဟီၣ်ခိၣ်ချၢဒ်သိးကမၤ တၢ်စံၣ်တဲၤတဲလီၤတၢ်မၤအံၤအဂီၢ်လီၤ. တၢ်ဂ့ၢ်လၢယ့ၣ်ၡူး စံၣ်တဲၤတဲလီၤဝဲန့ၣ် ပှၤဂီၢ်မုၢ်ဒိကနၣ်ဝဲမုာ်ဒိၣ်မး ဒီးအဝဲသ့ၣ်လဲၤပိာ်ဝဲ ယ့ၣ်ၡူးအခံလၢတၢ်လီၢ် ကိးတီၤဒဲးလီၤ.
“တုၤအကတိၤတၢ် ကဘျံးကဘျၣ်ဒီး, မ့ၢ်အကတိၤတၢ်လၢ အတၢ်ဒၣ်ဝဲလီၤ. အဂ့ၢ်ဒ်အံၤ, မ့ၢ်ပှၤလၢအကတိၤတၢ် ကဘျံးကဘျၣ်, ဒီးမ့ၢ်တၢ်ကတိၤကဘျံးကဘျၣ်အပၢ်လီၤ.”—ယိၤဟၣ် ၈:၄၄