Vava Yesu kavubwa, mwand’avelela wamfila muna makanga. Kadia kana lekwa kimosi ko mu lumbu 40. Nzala kikilu kakala zau. Nkadi ampemba wayiza tonta Yesu. Wamvovesa vo: ‘Avo u Mwan’a Nzambi kikilu, vovesa matadi mama vo makituka se mbolo.’ Kansi, Yesu wasadila e Sono yo kumvovesa vo: ‘Diasonama vo muntu mayingi kevuanga o mfunu muna zinga, ke madia kaka ko. Kafwete lemvokelanga mawonso kevovanga o Yave.’

I bosi, Nkadi ampemba wavovesa diaka Yesu vo: ‘Avo u Mwan’a Nzambi kikilu, uyituba vana ntoto tuka vana lusangidiku lwa tempelo. Diasonama vo Nzambi otuma mbasi zandi kimana basimba.’ Kansi, Yesu wasadila diaka e sono kia Nkand’a Nzambi yo vova vo: ‘Diasonama vo kufwete tonta Yave ko.’

I bosi, Satana wasonga Yesu yintinu yawonso ya nza ye mavua ye nkembo au. Wavova vo: ‘Ikuvana yintinu yayi yawonso yo nkembo au avo unsambidi kana nkutu nkumbu mosi kaka.’ Kansi, Yesu wamvovesa vo: ‘Katuka, e Satana. Diasonama vo Yave kaka ofwete sambila.’

I bosi, Nkadi ampemba wayenda. Mbasi zayiza kwa Yesu yo kumvana madia. Tuka muna lumbu kiakina, Yesu wayantika samuna e nsangu zambote za Kintinu. Kiaki i salu katuminua ova ntoto. Wantu bayangalelanga mana Yesu kabalonganga. Muna kuma kiaki, banlandanga konso kuna kayendanga.