Jesu hasaakolobelizwe, moya okenile wamuisa mwa lihalaupa. Naasika ca sesiñwi ka mazazi a 40 mi naashwile hahulu tala. Cwale Diabulosi ataha kuto lika Jesu mi ali ku yena: ‘Haiba luli u Mwanaa Mulimu, bulelela macwe a kuli afetuhe linkwa.’ Kono Jesu aalaba ka kuama kwa Mañolo, ali: ‘Kuñozwi kuli mutu hatokwi feela sico kuli apile. Utokwa kuteeleza kwa manzwi kaufela abulela Jehova.’

Hasamulaho, Diabulosi alika Jesu hape ali: ‘Haiba luli u Mwana a Mulimu, tulela fafasi kuzwa fa sibaka sesilumbile hahulu sa tempele. Kuñozwi kuli Mulimu ukaluma mangeloi ahae kuli akuakwele.’ Kono Jesu hape amualaba ka kuitusisa Mañolo ali: ‘Kuñozwi kuli hauswaneli kulika Jehova.’

Cwale, Satani abonisa Jesu mibuso kaufela ya lifasi ni bufumu ni kanya yayona mi ali: ‘Nika kufa mibuso ye kaufela ni kanya yayona haiba unilapela feela hañwi.’ Kono Jesu aalaba ali: ‘Zwa ku na, Satani! Kuñozwi kuli uswanela feela kulapela Jehova.’

Diabulosi asiya Jesu mi mangeloi ataha ni kuto fa Jesu lico. Kuzwa ka yona nako yeo, Jesu akalisa musebezi wa kukutaza taba yende ya Mubuso. Neli ona musebezi wanaa lumezwi kuli ato eza fa lifasi. Batu nebalata zanaa baluta Jesu mi neba mulatelela kwanaaya kaufela.