DILONGESHA DIA 75
Diabolo udi uteta Yezu
Panyima pa bamane kubatiza Yezu, nyuma muimpe wakamulombola mu tshipela. Wakenza matuku 40 kayi mudie kantu nansha kamue to, yeye kumvua nzala ya dikema. Pashishe Diabolo wakalua bua kumuteta, kumuambilaye ne: ‘Biwikala bushuwa udi Muana wa Nzambi, ambila mabue aa andamuke mampa.’ Kadi Yezu wakamuandamuna ne mêyi a mu Bible wamba ne: ‘Mbafunde ne: kuena ne bua kuikala ne muoyo anu bua biakudia to. Udi ne bua kuteleja mêyi onso adi Yehowa wamba.’
Pashishe Diabolo wakateta kabidi Yezu wamba ne: ‘Biwikala bushuwa udi Muana wa Nzambi, tumpika muaba mule menemene wa ntempelo eu, udiele panshi. Bualu mbafunde ne: Nzambi neatume banjelu bende bua bakuakidile.’ Kadi Yezu wakatela kabidi mêyi a mu Bible wamba ne: ‘Mbafunde ne: Kuena ne bua kuteta Yehowa to.’
Pashishe Satana wakaleja Yezu makalenge onso a pa buloba ne mabanji awu ne butumbi buawu, kumuambilaye ne: ‘Nenkupeshe makalenge onso aa ne butumbi buawu wewe muntendelele nansha kasangu kamue.’ Kadi Yezu wakamuandamuna ne: ‘Umbuka, Satana! Bualu mbafunde ne: udi ne bua kutendelela anu Yehowa.’
Panyima pa bualu ebu, Diabolo wakashiya Yezu, ne banjelu bakalua, kumupeshabu biakudia. Kutuadijila anu dîba adi, Yezu wakatuadija kuyisha lumu luimpe lua Bukalenge bua Nzambi. Ke mudimu uvuabu bamutume bua kuenza pa buloba. Bantu bavua banange malu avua Yezu ubalongesha, ke bualu kayi bavua bamulonda kuonso kuvuaye uya.
“Padi [Diabolo] wamba bualu bua dishima, udi wakula bilondeshile tshidiye menemene, bualu mmuena dishima ne tatu wa dishima.”—Yone 8:44
Mona bikuabu:
YEZU UDI NJILA NE BULELELA NE MUOYO
Tshidi mateta avua Yezu mupete atulongesha
Ditetshibua dia Yezu didi dileja malu manene abidi adi atangila Diabolo.
LONGA MALU KUDI MULONGESHI MUNENE
Tudi ne bua kutantamena mateta
Ntshinyi tshiudi ne bua kuenza padi muntu ukuambila bua kuenza bualu bubi?
