Omu valingile Yesu hivanamumbapachisa lyehi, shipilitu yajila yamutwalile mupambo. Yesu atwamine nazala hamakumbi 40 chakuzeneka kulya, ngocho zala yamukwachile chikuma. Kaha Liyavolo ejile nakweseka Yesu hakumulweza ngwenyi: ‘Kachi nge umwanaKalunga, amba malolwa awa alumuke kupwa mbolo.’ Oloze Yesu amukumbulwile kuzachisa Visoneka ngwenyi: ‘Vasoneka ngwavo, mutu keshi kuyoyela hambolo kahako, oloze mutu atela kwivwilila kumazu mwahanjika Yehova.’

Kufumaho, Liyavolo esekele cheka Yesu hakumulweza ngwenyi: ‘Kachi nge umwanaKalunga, limbile hamavu, kufuma helu lyatembele. Mwomwo vasoneka ngwavo, Kalunga mwakatuma vangelo jenyi kaha navakakuzundula.’ Oloze Yesu amukumbulwile cheka kuzachisa Visoneka ngwenyi: ‘Vasoneka cheka ngwavo, kanda naukeseka Yehova Kalunga koveko.’

Kutwala muze, Satana asolwelele Yesu mawangana osena amukaye naluheto, naupahu wawo nakwamba ngwenyi: ‘Nangukuhana mawangana osena, naupahu wavo kachi nge mungulemesa.’ Oloze Yesu amukumbulwile ngwenyi: ‘Fumaha, ove Satana, mwomwo vasoneka ngwavo, watela kulemesanga Yehova kaha ukawenyi.’

Kufumaho Liyavolo amusezele, kaha vangelo vejile nakuhana Yesu vyakulya. Kufuma vene haze, Yesu ambulwilenga mujimbu wamwaza waWangana waKalunga. Mulimo kana ukiko vamutuminyinyine hano hamavu. Hakuwana nge vatu vazangilenga vyuma avanangwilenga Yesu, ngocho vamukavangijilenga kala kuchihela ayilenga.