Yesu chapapatisheweliyi, spiritu yajila yamutwalili mwisaña. Hadi mafuku 40 hadiilihu chuma chidi chejimaku nawa watiyili nzala chikupu. Kuhiñahu Diyabolu wenjili nakumweseka Yesu nawa wamwilili nindi: ‘Neyi chalala wudi mwana kaNzambi, lejaku awa malola abalumuki mankendi.’ Ilaña Yesu wamwakwili kuhitila mukuzatisha Nsona nindi: ‘Chasonekewa nawu hiwatela kuhanda hohu nayakudaku. Watela kutiyilila kumazu ejima ahoshañayi Yehova.’

Kuhiñahu, Diyabolu wamwesekeli Yesu nindi: ‘Neyi chalala wudi Mwana kaNzambi, kilukaku nakufuma heluña dadilehi nankashi dahatembeli. Chasonekewa nawu Nzambi wakatemesha añelu jindi kulonda akakubakili.’ Ilaña Yesu wazatishili cheñi Nsona nindi: ‘Chasonekewa nawu bayi wumweseka Yehovaku.’

Kuhiñahu, Satana wamulejeli Yesu mawanta ejima amukaayi, maheta awu nikulema kwawu nawa wamulejeli nindi: ‘Nukukwinka awa mawanta ejima nikulema kwawu neyi wukudifukula kudi ami kamu hohu.’ Ilaña Yesu wamwakwili nindi: ‘Fumaku aha, eyi Satana! Chasonekewa nawu watela kudifukula kudi Yehova hohu.’

Kufumahu Diyabolu wayili nawa añelu enjili nakumwinka Yesu yakuda. Kufuma hayoyeniyi mpinji, Yesu watachikili kushimwina nsañu yayiwahi yaWanta. Dimudimu wamutemesheleliwu hamaseki. Antu akeñeli yuma yayidizishileñawu kudi Yesu nawa amulondeleleña kwejima kwayileñayi.