Tej otoqxi jaw aʼ twiʼ Jesús, xi qʼiʼn tuʼn xewbʼaj xjan toj tzqij txʼotxʼ. Mintiʼ waʼn 40 qʼij, tuʼntzunju tzaj nim weʼyaj tiʼj. Pontzun Tajaw il tuʼn tok tuʼn toj malbʼil. Tnejel xi tqʼamaʼn jlu te: «Qa Tkʼwaʼl Diosa, qʼamanxa tuʼn kyok abʼj lu te wabʼj». Noqtzun tuʼnj, xi ttzaqʼweʼn Jesús tukʼil junjun yol e jatz tiʼn toj Tyol Dios: «At jun yol tzʼibʼin: Mya noq oʼkx tuʼn wabʼj kʼanqʼil xjal, ax ikx il tiʼj tuʼn tok tbʼiʼn aju in tzaj tqʼamaʼn Jehová».

Ok Jesús juntl maj toj joybʼil tuʼn Tajaw il: «Qa Tkʼwaʼl Diosa, xon kuʼx tibʼa twitz txʼotxʼ; porke at jun yol in tmaʼn tuj Tuʼjil: Kxel tmaʼn Dios kye t-anjel tuʼn tok kwentina kyuʼn». Xi ttzaqʼweʼn Jesús juntl maj kyukʼil yol tkuʼx toj Tyol Dios: «Ax ikx at jun yol tzʼibʼin: Miʼn tzʼok kyqʼoʼne Qman Dios toj malbʼil».

Te mankbʼil, xi tyekʼin Satanás tkyaqil kawbʼil twitz txʼotxʼ ex qe qʼinumabʼil te Jesús ex xi tqʼamaʼn jlu te: «Tkyaqil jlu kxel nqʼoʼne teya qa ma kubʼ ẍmejeʼya kʼulul nwitze». Xi ttzaqʼweʼn Jesús te: «Txiʼya Satanás, porke at jun yol tzʼibʼin: Twitz Qman tuʼn kykʼulune, aju Kydiose, ex oʼkx te tuʼn kyajbʼene».

Tuʼntzunju, ikʼ bʼet Tajaw il. E ul junjun anjel ex xi kyqʼoʼn twa Jesús. Tej otoqxi bʼaj jlu, xi tzyet tuʼn tpakbʼan Jesús tiʼj tbʼanel tqanil tiʼj Tkawbʼil Dios. Atzun taqʼun otoq t-xi tqʼoʼn Jehová tuʼn tbʼant tzalu twitz Txʼotxʼ. Kygantoq xjal aju in xi t-xnaqʼtzaʼn Jesús, ex kukx bʼant jlu tuʼn noq jaxku tumel.