Satepan ke Jesús moauij, yektikatsin espíritu kiyekanak maj youi taluakyan. Amo teyi kikuaj 40 tonalmej uan yejua ika tel mayanaya. Ompa, Amokuali ajsik porin kitemouaya kichiuas maj Jesús tajtako. Yekinika kiluij: “Komo yekmelauj tiikoneuj Dios, xikinilui nejin temej maj mochiuakan panes”. Sayoj ke Jesús kinankilij ika seki tajtolmej tein moajsij itech iTajtol Dios: “Ijkuiliujtok ke taltikpakneminij amo sayoj yoltoskej komo takuaj, ta no moneki kikakiskej nochi tein kijtoua Jiova”.

Amokuali kitemoj maj Jesús tajtako ika okse taman: “Komo yekmelauj tiikoneuj Dios, ximopankajkaua kampa okachi uejkapan itech templo. Ijkuiliujtok ke Dios kinualtitanis ángeles maj mitsmakixtikij”. Sayoj ke Jesús oksepa kinankilij ika seki tajtolmej tein moajsij itech iTajtol Dios: “Ijkuiliujtok ke moneki amo tikchiualtis Jiova maj kinexti tein ueli kichiua”.

Ika tamik, Satanás kinextilij nochi tekiuajyomej tein moajsij itech nochi taltikpak uan tomin tein kipiaj uan ininueyiyo, uan kiluij: “Nimitsmakas nochi nejin tekiuajyomej uan ininueyiyo komo sayoj sepa tinechueyichiua”. Sayoj ke Jesús kinankilij: “¡Xiyouj Satanás! Ijkuiliujtok ke moneki se kiueyichiuas sayoj Jiova”.

Yejua ika Amokuali yajki, uan seki ángeles ualajkej uan kitamakakej Jesús. Satepan, Jesús peuak kitematiltia tein kuali tein kichiuas iTekiuajyo Dios. Yejua nejon kinauatijka Jiova maj kichiua itech taltikpak. Taltikpakneminij kiteluelitayaj tein Jesús tamachtiaya, uan kitojtokayaj kampa yeski yaya.