Etyi Jesus ambatisalwa ononkhono mba Huku ambumutuala moluhandya. Akala ononthiki 40 tyihali natyike aliwa nondyala imwe onene. Eliapu alilolo Jesus okuti: ‘Inkha ove tyili-tyili Umona wa Huku popila omamanya aa atyituke onombolo.’ Jesus apopi Ovihonekwa opo akumbulule, ati: ‘Omunthu kakala-ko vala mokonda yokulia. Wesukisa okutehelela onondaka ambuho Jeova apopia.’

Konyima Eliapu alilolo vali Jesus aliti: ‘Inkha ove tyili-tyili Umona wa Huku enda peulu liondyuo ya Huku ohombokela pohi. Tyahonekua okuti Huku matumu onoandyu mbae opo mbukuyakule.’ Jesus apopi vali Ovihonekwa opo akumbulule, ati: ‘Tyahonekua, kupondola okulola Jeova.’

Satanasi alekesa Jesus omauhamba aeho omouye nomalumono nomunkhima, emupopila okuti: ‘Mandyikuavela omauhamba aeho nomunkhima ankho ufenda vala kuame like.’ Mahi Jesus akumbulula okuti: ‘Tunda pano Satanasi! Tyahonekua okuti una vala okufenda Jeova.’

Iya Eliapu aliende, akuya onoandyu ambuavela Jesus okulia. Tunde opo Jesus ahimbika okuivisa onondaka onongwa Mbouhamba. Okulinga otyilinga aendela pano pohi. Ovanthu ankho vehole unene etyi Jesus evelongesa iya ankho vemukuama kese apa enda napo.