Yesu ku yaaherize kubatizibwa, omwoyo gurikwera gukamutwara omu ihamba. Akamara ebiro 40 atarikurya, kandi akagira enjara nyingi. Bwanyima Omuregi akaija kugyeza Yesu yaamugira ati: ‘Ku oraabe ori Omwana wa Ruhanga, gambira amabaare aga gahindukye emigaati.’ Kwonka Yesu akamugarukamu ati: ‘Kikahandiikwa ngu, omuntu tatungwa by’okurya byonka. Kureka naayetenga n’okuhurira ebigambo bya Yehova.’

Ekindi, Omuregi akagambira Yesu ati: ‘Ku oraabe ori Omwana wa Ruhanga, guruka orugye aha mutwe gwa hekalu. Ahakuba kikahandiikwa ngu, Ruhanga aryaragiira baamaraika be, bakukwate.’ Kwonka Yesu akagarukamu ati: ‘Kikahandikwa ngu otarigyeza Yehova.’

Bwanyima, akooreka Yesu obugabe bw’ensi bwona, obugaiga n’obushoboorozi kandi yaamugira ati: ‘Niinyija kukuha obushoboorozi obu bwona n’ekitiinisa kyabwo; ku orainame, wandamya.’ Kwonka Yesu akamugarukamu ati: ‘Ndugaho Sitaane! Kikahandiikwa ngu, oramye Yehova Ruhanga wenka.’

Bwanyima omuregi akagyenda, kandi baamaraika bakaija baaha Yesu eby’okurya. Kuruga obwo, Yesu akatandika kubuurira amakuru marungi. Nigwo murimo ogu yaizire kukora omu nsi. Abantu bakaba nibakunda ebi Yesu yaabeegyeise, kandi bakaba bamukuratira ahu yaabaire aza hoona.