Mɔɔ bɛzɔnenle Gyisɛse bɛwiele la, sunsum nwuanzanwuanza ne vale ye hɔle fienemgbole ne anu. Yeanli debie kenle 40, yemɔti ɛhɔne hunle ye. Akee Abɔnsam razɔle Gyisɛse nleanle na ɔhanle kɛ: ‘Saa ɛle Nyamenle ara a, ka kile awolɛ ɛhye mɔ maa bɛhakyi paano.’ Noko Gyisɛse vale Ngɛlɛlera ne anu edwɛkɛ buale kɛ: ‘Bɛhɛlɛ kɛ tɛ aleɛ angome a maa sonla tɛnla ngoane nu a. Ɔwɔ kɛ ɛtie edwɛkɛ biala mɔɔ Gyihova kɛha la.’

Eza Abɔnsam hanle hilele Gyisɛse kɛ: ‘Saa ɛle Nyamenle Ara amgba a, ɛvi ɛzonlenlɛ sua ne ati zo fuandi ɛ nwo te aze. Bɛhɛlɛ kɛ Nyamenle bazoa ye anwumabɔvolɛma yeamaa bɛazɔ wɔ.’ Noko Gyisɛse vale Ngɛlɛlera ne anu edwɛkɛ hanle kɛ: ‘Bɛhɛlɛ kɛ mmasɔ Gyihova ɛnea.’

Akee Seetan vale ewiade arelemgbunlililɛ kɔsɔɔti nee nuhua anwonyia yɛɛ anyunlunyia hilele Gyisɛse na ɔhanle kɛ: ‘Saa ɛsonle me kokye ala a, mebava ninyɛne ɛhye mɔ amuala meamaa wɔ.’ Noko Gyisɛse buale ye kɛ: ‘Fi ɛke kɔ Seetan! Bɛhɛlɛ kɛ Gyihova angome a ɔwɔ kɛ ɛsonle ye a.’

Akee Abɔnsam hɔle, na anwumabɔvolɛma rale na bɛmaanle Gyisɛse aleɛ bɛmaanle ɔlile. Ɔvi mekɛ zɔhane, Gyisɛse bɔle Belemgbunlililɛ ne anwo edwɛkpa ne nolo. Gyima mɔɔ bɛzoanle ye wɔ azɛlɛ ye azo kɛ ɔrayɛ la ɛne. Menli anye liele mɔɔ ɔhilehilele bɛ la anwo, na ɛleka biala mɔɔ ɔhɔle la bɛdoale ye.