Ọke i Jesu o bromarhame hin, ẹhẹn ọfuanfon na no sun rien riẹ ato. Ọsoso ẹdọke 40, Jesu ọ riẹ emru owuorowu-u, omarana, orhọmo no kpe yi gbangbanhon. Dẹbolo nọ rhe ma damu i Jesu ni, nọ ta riẹn: ‘Wu rhe ghini rhiẹ Ọmọ Osolobrugwẹ, ta rẹn itita enana nẹ aye i dẹriẹrhiẹ ibrẹdi.’ Ọrẹn, Jesu nọ kpahenrhọ riẹn nyoma ọ hunute oborẹ ọ ha uvuẹn Eyaya Ọfuanfon na: ‘A ya riẹ rhotọre taghene orhiẹ emaren ọvo yọ nọ lẹrhẹ ohworho nyerẹ-ẹn. Wu na vi kerhọ ọsoso ẹmro i Jehova ọ ta.’

Ọgbọreva ye, Dẹbolo nọ ta rẹn i Jesu: ‘Wu rhe ghini rhiẹ Ọmọ Osolobrugwẹ, pho nẹ ekete rọ mai rierun uvuẹn oghwa ẹga na. A ya riẹ rhotọre taghene Osolobrugwẹ ono dje emakashe enẹyen, nẹ aye i mwuo.’ Ọrẹn, ọgbọrọrọ Jesu nọ hunute oborẹ ọ ha uvuẹn Eyaya Ọfuanfon na: ‘A ya riẹ rhotọre taghene wu vwa damu Jehova ni-i.’

Ọgbọresa ye, Echu no dje ọsoso ivie ọrhẹ efe akpọ na rẹn i Jesu, nọ tare: ‘Mi na ha ọsoso ivie enana ọrhẹ odidi aye wẹn, wu rha ha ẹga mẹ ukwọgbọ ọvo.’ Ọrẹn, Jesu nọ kpahenrhọ riẹn: ‘Nya nẹ aran, Echu! A ya riẹ rhotọre taghene i Jehova ọvo ya na ha ẹga riẹn.’

Dẹbolo nọ nyajẹ i Jesu vwo, emakashe ni ma yẹ i Jesu emaren. Nẹ ọke ọrana nyarhẹn, Jesu no ghwoghwo iyẹnrẹn esiri Uvie na. Ọrana yẹ owian ra fọkiẹ dje yi rhiẹ otọrakpọ na. Ihworho i vwo ẹguọlọ kpahen i Jesu ọrhẹ oborẹ o yonirin aye, aye ne lele riẹ ekete rọ nya ephian.