Jesús bautizarishca qꞌuipaca Diospaj espirituca shitashca pambamanmi paita pusharca. 40 punllacunata mana micushcamantami achcata yaricachirca. Chaimi Diablo shamushpa Jesustaca, ‘Diospaj Churitaj cashpaca cai rumicunata tanda tucuchun niyari’ nirca. Shinapish Jesusca, ‘quillcachishcapica runaca micunallahuanca mana causanchu. Causangapajca Jehová Diosmanta yachanatapish uyanatapishmi minishtin’ nircami.

Cutinmi Diabloca pandachisha nishpa Jesustaca, ‘Diospaj Churitaj cashpaca Diospaj huasi jahua puntamanta huashicui. Quillcachishcapica canta japichun Diosca paipaj angelcunata cachangami’ nircami. Cutin Jesusca, ‘quillcachishcapica Diostaca ama yangamanta caita chaita rurai nichu ninmi’ nircami.

Qꞌuipaca tucui cai pachapi mandanacunata, chaipi tiyashcacunatapish Jesusman ricuchishpami Diabloca, ‘ñucata shuj cutinlla adorajpica tucui caicunatami cusha’ nirca. Shina nijpimi Jesusca, ‘¡anchui Satanás! Quillcachishcapica Jehovallatami adorana canchij’ nishpa cutichirca.

Pandachinata mana valishpa Diablo rijpimi huaquin angelcuna shamushpa Jesusman micunata cararcacuna. Chai qꞌuipaca Dios churashca Mandanamantami Jesusca huillai callarirca. Chaita rurachunmi Jehová Diosca paiman mingashca carca. Jesús yachachishcata uyanata munashpami gentecunaca tucui ladocunaman paita catircacuna.