75 KAQ YACHACHIKUY
Satanasta Jesus qipanchasqanmanta
Bautizakusqan qipallamanmi Jesustaqa Diospa chuya espiritun chunniqman pusarqa, chaypim Jesusqa 40 punchaw imatapas mana mikurqachu. Chaypim satanas diabloqa pantarachiyta munaspan nirqa: “Diospa churin kaspaykiqa, kay rumikunatayá tantayarachiy”, nispa. Jesusmi ichaqa Diospa qillqachisqanman hina satanasta nirqa: “Runaqa kawsan manam mikuyllawanchu aswanqa Jehova Diospa nisqanta kasukuspanmi”, nispa.
Kaqmantam satanasqa Jesusta nirqa: “Diospa churin kaspaykiqa Diospa wasinpa hawanmantayá pawaykuy. Qillqasqam kachkan: ‘Jehova Diosmi angelninkunata kachamunqa hapisunaykipaq’”, nispa. Jesusñataqmi kaqmanta nirqa: “Qillqasqam kachkan: ‘Amam Jehova Diosta pruebaman churankichu’”, nispa.
Yapamantam Satanasqa kay allpa pachapi tukuy imakunata qawachispan Jesusta nirqa: “Tukuy kaykunatam qusqayki huk kutillatapas yupaychawaptikiqa”, nispa. Chaynata niptinpas Jesusqa nirqam: “¡Pasaway satanas! Qillqasqam kachkan: ‘Jehova Diosllatam yupaychanaykiqa’”, nispa.
Chaynapim satanasqa pasakurqa. Chay qipallamantaqmi angelkuna Jesusman mikuchiq hamurqaku. Chaymantam Jesusqa Diospa munaychakuyninmanta willakuytaña qallaykurqa, runakunapas yachachisqanta uyariyta munaspankum qatirqaku.
“Llullata rimaspanqa imayna kasqanman hinam [satanasqa] riman, payqariki llullam hinaspapas llullakunapa taytanmi” (Juan 8:44).