Bautizakusqan qhepamanmi Jesusta santo espíritu ch’inneqman pusaran. Jesusqa 40 p’unchaytan mana mijuranchu, jinan sinchita yarqachikuran. Chaymi Satanasqa Jesusta niran: “Diospa wawanchus kanki chayqa, kay rumikunata niy t’antaman tukunanpaq”, nispa. Jesusmi ichaqa kutichiran: “Qelqasqan kashan runaqa manan t’antallatachu necesitan kausananpaq, Diospa simintawanmi uyarinan”, nispa.

Jinan Satanasqa nillarantaq: “Diospa wawanchus kanki chayqa, templo patamanta saltaykuy. Qelqasqan kashan, Diosmi salvanasuykipaq angelninkunata kachamunqa”, nispa. Jesusmi ichaqa niran: “Qelqasqan kashan, aman Jehová Diosta pruebaman churankichu”, nispa.

Chaymantan Satanasqa Jesusman rikuchiran llapa gobiernokunata qhapaq kaynintawan, jinaspa niran: “Juj kutillata adorawanki chayqa, llapa kay gobiernokunata qhapaq kaynintawan qopusayki”, nispa. Jesustaq niran: “¡Ripuy Satanás! Qelqapin nishan: ‘Jehová Diosnillaykitan adoranki’”, nispa.

Chaymi Satanasqa ripuran, jinaspa angelkuna jamuspa Jesusman mijunata qoranku. Chay qhepamanmi Jesusqa Diospa gobiernonmanta predicayta qallariran. Chayta ruwananpaqmi Diosqa kay pachaman kachamuran. Runakunaqa kusikurankun Jesuspa yachachisqanwan, chaymi tukuy ladomanta Jesusta uyariq jamuranku.