Bautizarishca jipaca Diospa espíritu santota chasquimandami, Jesusca chaquishca pambaman rirca. Chai pambapi cashpaca 40 punllacunatami na micushca carca. Chaimandami ninanda yarjachijurca. Chaimi Diabloca Jesusta pandachingapaj shamushpa cashna nirca: “Taita Diospaj Churipacha cashpaca, cai rumicunata tandaman tigrachi” nishpa. Shina nijpimi Jesusca cashna tigrachirca: “Escribishcapica cashnami nijun: ‘Gentecunaca, na tandahuanlla causangachu. Ashtahuangarin Taita Dios rimashca tucuilla shimicunahuanmi causanga’” nishpa.

Diabloca Jesusta pandachingapaj munashpami cutin cashna nirca: ‘Diospa huasi jahuaman vitsiashpa, Taita Diospa Churipacha cashpaca, caimanda ucuman urmai’ “Escribishcapica cashnami nijun: ‘Canda cuidachunga Taita Diosca, paipaj angelcunatami cachamunga’” nishpa. Shina nijpimi Jesusca Diablotaca nirca: “Escribishcapica nijunmi: ‘Canda Mandaj Taita Diostaca, ama can munashcata rurachun mandanguichu’” nishpa.

Chai jipaca Diabloca “cai pachapi muyundi tucui llactacunatapash, chai llactacuna juyailla cajtapashmi [Jesusman] ricuchirca”. Chai jipaca nircami: “Ñucata cungurishpa ninanda alicachijpica, caicunataca tucuillatami canman cusha” nishpa. Shina nijpimi Jesusca nirca: “Satanás, caimanda anchuri. Escribishcapica, cashnami nijun: ‘Canda Mandaj Taita Diostalla ninanda alicachingui. Paitalla servishpa causangui’” nishpa.

‘Shina nijpimi Diabloca, Jesuspa ladomanda anchurishpa rirca. Chaimi angelcuna shamushpa Jesusta sirvinajurca’. Chai jipallami Jesusca Taita Diospa Reinomanda ali villaicunata villai callarirca. Jehová Diosca cai Alpapi villachichunmi Jesustaca mandarca. Jesús yachachishcata ninanda uyanayachishpami gentecunaca tucui ladocunaman catin carca.