Откеда о Исус крстинѓа пе, о свети дух ингарѓа ле ки пустина. На хаља ништо 40 диве, хем адалеске сине бут бокхало. Тегани о Бенг ало ки лесте те искушинел ле, хем вакерѓа леске: „Ако сиан чаче е Девлескоро Чхаво, вакер акале баренге те овен маре“. Ама, о Исус одговоринѓа леске аѓаар со цитиринѓа таро е Девлескоро Лафи: „Пишимо тано кај е манушеске на ваљани само хајбе те шај те живинел. Него ваљани те шунел секова лафи со авела таро Јехова“.

Пало адава, о Бенг вакерѓа е Исусеске: „Ако сиан чаче е Девлескоро Чхаво, рупин таро најучо дело таро храми. Пишимо тано кај о Девел ка бичхалел пле ангелен те астарен тут те на пере“. Ама, о Исус палем цитиринѓа таро е Девлескоро Лафи: „Пишимо тано кај на ваљани те испитина е Јехова“.

Ко крајо, о Сатана сикавѓа е Исусеске са о царствија ко свето, цело ленгоро барвалипе хем и слава, хем вакерѓа леске: „Са акала буќа ка дав лен туке само ако јекх пути поклонинеа тут манге“. Ама, о Исус одговоринѓа леске: „Наш, Сатано! Пишимо тано кај ваљани те служина само е Јеховаске“.

Тегани о Сатана гело песке, а о ангелија але ки лесте хем денѓе ле нешто те хал. Оттегани, о Исус почминѓа те проповединел о шукар хабери башо е Девлескоро Царство. Ов сине бичхалдо ки Пхув баш адалеске. Е манушенге свиџинела пе сине адава со вакерела о Исус хем адалеске џана сине пали лесте коте со џала сине.