Otkeda o Isus krstingja pe, o sveti duh ingargja le ki pustina. Na halja ništo 40 dive, hem adaleske sine but bokhalo. Tegani o Beng alo ki leste te iskušinel le, hem vakergja leske: „Ako sian čače e Devleskoro Čhavo, vaker akale barenge te oven mare“. Ama, o Isus odgovoringja leske agjaar so citiringja taro e Devleskoro Lafi: „Pišimo tano kaj e manušeske na valjani samo hajbe te šaj te živinel. Nego valjani te šunel sekova lafi so avela taro Jehova“.

Palo adava, o Beng vakergja e Isuseske: „Ako sian čače e Devleskoro Čhavo, rupin taro najučo delo taro hrami. Pišimo tano kaj o Devel ka bičhalel ple angelen te astaren tut te na pere“. Ama, o Isus palem citiringja taro e Devleskoro Lafi: „Pišimo tano kaj na valjani te ispitina e Jehova“.

Ko krajo, o Satana sikavgja e Isuseske sa o carstvija ko sveto, celo lengoro barvalipe hem i slava, hem vakergja leske: „Sa akala bukja ka dav len tuke samo ako jekh puti pokloninea tut mange“. Ama, o Isus odgovoringja leske: „Naš, Satano! Pišimo tano kaj valjani te služina samo e Jehovaske“.

Tegani o Satana gelo peske, a o angelija ale ki leste hem dengje le nešto te hal. Ottegani, o Isus počmingja te propovedinel o šukar haberi bašo e Devleskoro Carstvo. Ov sine bičhaldo ki Phuv baš adaleske. E manušenge svidžinela pe sine adava so vakerela o Isus hem adaleske džana sine pali leste kote so džala sine.