Ked o Isus krstindža pe, o sveti duh ljegardža lje ki pustinja. Ov hine but bokhalo sose ništa na halja 40 dive. Tegani o Beng alo koro ljeste te iskušini lje hem vačerdža ljese: „Ako čače hijan e Devljeso Čhavo, phen akalje barendže te oven mare.“ Ama, o Isus odgovorindža ljese adžahar so citirindža kotar e Devljeso Lafi: „Pisimo tano so e manušese na valjani samo hajbe te šaj te živini. Nego valjani te šunel svako lafi so avela kotar Jehova.“

Palo odova, o Beng phendža e Isusese: „Ako hijan čače e Devljeso Čhavo, ripin kotar hramsko zido. Pisimo tano so o Devel ka bičhalji pe anđelen te astaren tut te na pere.“ Ama, o Isus paljem citirindža kotar e Devljeso Lafi: „Pisimo tano so na valjani te iskušina e Jehova.“

Ko krajo, o Satana mothovdža e Isusese sa o kraljevstvija ko sveto, oljengo barvaljipe hem oljengi slava hem phendža ljese: „Sa akala buča ka dav tuče ako samo jekh puti poklonineja tut maje.“ Ama, o Isus odgovorindža ljese: „Naš, Satana! Pisimo tano so valjani te služina samo e Jehovase.“

Tegani o Satana dželo, a o anđelija alje ko Isus hem dindže ljese diso te hal. Kotar tegani, o Isus počmindža te propovedini o šukar haberi kotar e Devljeso Kraljevstvo. Odoljese hem hine bičhaldo ki phuv. Sa so o Isus sikavdža e narodo oljendže sviđindža pe, odoljese hem pratindže lje kuri god dželo.