ROSO 75
Daawuloosi Yesuusa Fonqoli
Yesuusi cuuami gedensaanni, qullaawu ayyaani halallira haaˈre haˈrinosi. Isi hakkiicho 40 barra woˈma sagale itinokki daafira, lowo geeshsha hudiˈrino. Hakkiinni Daawuloosi Yesuusa fonqolara dayi; Daawuloosi togo yii: ‘Hanni ati Maganu Beettootiro, tini kinna tima ikkitanno gede hajaji.’ Yesuusi kayinni Qullaawu Maxaafi giddonni togo yee qolisi: ‘Mannu heeˈrannohu sagaletenni calla diˈˈikkino yine borreessinoonni. Yihowa kulannore baala macciishsha hasiissanno.’
Hakkiinni Daawuloosi Yesuusa togo yee fonqoli: ‘Hanni ati Maganu Beettootiro, qullaawu mini guunxonni kubbi. Maganu, anga woroonni worte kayissannohe gede sokkaasinesi soyanno yine borreessinoonni.’ Yesuusi kayinni xaano Qullaawu Maxaafi giddonni togo yee qoli: ‘Yihowa Maganokki fonqoltooti yine borreessinoonni.’
Hakkiinni Daawuloosi Yesuusira alamete gashshoote, jironna ayirrinye leellishisi gedensaanni togo yiisi: ‘Mitte higge anera kumbuulittoero, konne baala gashshootenna ayirrinye eemmohe.’ Yesuusi kayinni togo yee qolino: ‘Koo Sheexaane, anewiinni fafi! Yihowara calla kumbuuli yine borreessinoonni.’
Hakkiinni Sheexaanu agure haˈri; hakkunni gedensaanni sokkaasine Yesuusiwa dagge sagale uyitinosi. Hatte yannanni kayise Yesuusi Maganu Mangisteha dancha duduwo duduwino. Maganu iso uullara soyinohu konne looso loosaraati. Mannu Yesuusi rosiisinonsare baxino; hattono insa isi haˈriwa baalawa hadhino.
“Daawuloosi . . . kaphaanchonna kaphu anna ikkinohura, kapho coyiˈranno woyite rosinorella assanno.”—Yohaannisi 8:44