LESONA 75
Tofotofoina e le Tiapolo Iesu
Ina ua uma ona papatisoina Iesu, ona taʻitaʻia lea o ia e le agaga paia i le toafa. E leʻi ʻai o ia mo aso e 40, o lea na ia lagona ai le fia taumafa. Ona sau ai lea o le Tiapolo e faaosooso Iesu ma fai mai iā te ia: ʻPe afai o oe moni o le Atalii o le Atua, inā fetalai atu ia i nei maa ia liu falaoa.’ Ae na tali atu Iesu e ala i le sii atu o Tusitusiga Paia: ʻUa tusia e lē na o meaʻai e ola ai le tagata. E manaʻomia ona e usiusitaʻi i upu uma e fetalai mai ai Ieova.’
Ona toe tofotofoina lea e le Tiapolo o Iesu e ala i le faapea mai: ʻPe afai o oe moni o le Atalii o le Atua, inā oso ia i lalo mai i lenei vaega maualuga o le malumalu. Ua tusia o le a auina mai e le Atua ana agelu e laveaʻi iā te oe.’ Ae na toe sii atu foʻi e Iesu Tusitusiga Paia: ʻUa tusia aua e te faia se mea e tofotofo ai iā Ieova.’
Ona faaali lea e Satani iā Iesu o malo uma o le lalolagi, o o latou ʻoa ma o latou mamalu ma faapea mai: ʻOu te avatua iā te oe nei malo uma ma o latou mamalu, pe afai e tau lava ina e tapuaʻi mai iā te aʻu.’ Ae na tali atu Iesu: ʻAlu ese ia oe Satani! Ua tusia e na o Ieova lava e tatau ona e tapuaʻi i ai.’
Ona alu ese ai lea o le Tiapolo, ma ua ō mai agelu ma avatu iā Iesu meaʻai e ʻai ai. Talu mai lenā taimi, na talaʻi atu e Iesu le tala lelei o le Malo. O le galuega lea sa auina mai o ia i le lalolagi e fai. Na fiafia tagata i mea sa aʻoaʻo atu e Iesu iā i latou, ma na latou mulimuli iā te ia i so o se mea lava na alu i ai.
“Pe a tautala [le Tiapolo] i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.”—Ioane 8:44
E te Ono Fiafia Foʻi
IESU—LE ALA, LE UPU MONI MA LE OLA
Aʻoaʻo ni Lesona Mai i le Auala na Fesagaʻia ai e Iesu Faaosoosoga
E lua ni mea moni ua faamaonia e faatatau i le Tiapolo mai i le auala na faaosoosoina ai Iesu.
Ia Faalogo i le Faia‘oga Sili
E Manaʻomia Ona Tatou Tetee Atu i Faaosoosoga
O le ā lau gaoioiga e fai pe a fai atu se tagata e fai se mea e te iloa e sesē?
