Kunyima kwa Yesu kubatshishiibwa, kikudi kiselele kibamutumine mu kabaaka. Tabaadi mudye kantu su nkamune munda mwa mafuku 40, baadi na nsala ikile. Akupu Dyabulu nkufika mu kutompa Yesu, amulungula shi: ‘Su we mwan’Efile Mukulu lungula ano mabwe aalulukye mikate.’ Anka Yesu nkumwalula bino: ‘Mbafunde shi: T’anka penda ku byakudya kwikeele muntu na muuwa nya. Nku kishima kyooso akituuku mukanwa mwa Yehowa.’

Dyabulu nkwelesha dingi Yesu mpaka p’aye kwakula shi: ‘Su we mwan’Efile Mukulu, tupika ku musaka wa ntempelo opone paashi. Mwanda bifundwe abyakula shi: Efile Mukulu akakutumina ba mwikeyilu bwa nkutwala.’ Yesu nkutumikisha dingi bifundwe amba shi: ‘Mbifundwe dingi shi: totompanga Yehowa Efile Mukulu.’

Akupu, Satana nkuleesha Yesu mafumu ooso a pa nsenga na mapeta na ntumbo yaao aakula shi: ‘Nakupa ano ooso mafumu na ntumbo yaao su bondangwila sunga musuusa umune.’ Anka Yesu bamwalulwile shi: ‘Katuka Satana! Mbifundwe shi: abitungu olangwile nka penda Yehowa.’

Kunyima Dyabulu nkukatuka, ba mwikeyilu nkufika abo nkupa Yesu kidibwa. Kubanga nka paapa, Yesu baabangile kulambukisha mukandu wibuwa wa Bufumu. Nyi mudimo ubaabadi bamutume bwa kukita pa nsenga. Bantu abaadi bafule myanda ibaadi ebalongyesha, abo nkumulonda kooso kubaadi eende.