Nasekabhajatisiwe Jesu, umoya longcwele wamyisa ehlane. Besekuphele emalanga langu-40 angadli futsi bekalambe kakhulu. Ngako Develi wamlinga watsi: ‘Nangabe uyiNdvodzana yaNkulunkulu, tjela lamatje ashintje abe tinkhwa.’ Kodvwa Jesu wamphendvula asebentisa umBhalo watsi: ‘Kubhaliwe kutsi angeke uphile ngesinkhwa sodvwa. Kudzingeka ulalele naloko Jehova lakushoko.’

Develi waphindze walinga Jesu watsi: ‘Nangabe uyiNdvodzana yaNkulunkulu, tijike phasi, ngobe kubhaliwe kutsi Nkulunkulu utawutfumela tingilosi takhe kutsi tikubambe.’ Kodvwa Jesu waphindze wamphendvula asebentisa umBhalo watsi: ‘Kubhaliwe kutsi akukafaneli ulinge Jehova.’

Ngako Sathane wabese ukhombisa Jesu yonkhe imibuso yemhlaba nebuhle bayo wase utsi: ‘Yonkhe lemibuso ngitakunika yona nawungangikhotsamela.’ Kodvwa Jesu waphendvula watsi: ‘Hamba Sathane! Ngobe kubhaliwe kutsi kufanele ukhonte Jehova kuphela.’

Ngemuva kwaloko Develi wamshiya, futsi tingilosi teta kuJesu tamnika kudla. Kusukela lapho Jesu washumayela tindzaba letimnandzi letimayelana neMbuso. Bekungumsebenti lebekatfunyelwe kutsi awente emhlabeni. Bantfu bebakutsandza loko Jesu bekabafundzisa kona futsi bebahlale bamlandzela.