Su tempong bọu nisahani, rohkẹ̌ masusi něngahạ si Yesus sarang padang belantara. Yesus tawe kimaěng karěngụe 40 su ěllone, kụ i sie sěbạe nahutung. Bọu ene, Setang diměnta gunang měnal᷊ukạ si Yesus. I sie nẹ̌bera, ’Mạeng i kau kahěngang-hěngang Ahusu Mawu, bal᷊uiko batu ini makoạ borotẹ̌.’ Katewe Yesus simimbahẹ̌, ’Piạ ayatẹ̌ naul᷊ị bal᷊inẹ kětạeng kaěng makakoạ si kitẹ měbiahẹ̌. I kitẹ lai harusẹ̌ tumuhụ su manga bawerang i Yehuwa.’

Bọu ene, Setang něnal᷊ukạ si Yesus, ’Mạeng i kau kahěngang-hěngang Ahusu Mawu, tumpạe bọu tampạ karangetange su bait, ual᷊ingu piạ ayatẹ̌ naul᷊ị Mawu sarung měngoro manga malaekatẹ̌ gunang měningkạ si kau.’ Katewe i Yesus simimbahẹ̌, ’Piạ lai ayatẹ̌ naul᷊ị i kitẹ tawẹ wotonge měnal᷊ukạ si Yehuwa.’

Bọu ene, Setang něnodẹ kěbị kararatuangu dunia, kakakalạe, dingangu karal᷊ěnggihe. Setang nẹ̌bera, ’Iạ sarung měgělị kěbị kararatuangu dunia dingangu karal᷊ěnggihe, asalẹ̌ i kau pěněmbah si siạ maning kětạeng sěnsul᷊ẹ.’ Katewe i Yesus simimbahẹ̌, ’Dakọe pěngal᷊ing Setang! Piạ ayatẹ̌ naul᷊ị, i kau harusẹ̌ maněmbah kětạeng si Yehuwa.’

Setang apidu natamai, bọu ene manga malaekatẹ̌ diměnta kụ něgělị kaěng si Yesus. Bọu ene, i Yesus něnětạ něhabarẹ̌ habarẹ̌ mapia soal u Kararatuang. Ene tugasẹ̌ harusẹ̌ koatenge su dunia. Taumata puluang su těntirong i Yesus. I sire timol᷊e si sie maning saranga i sie rumal᷊eng.