Tafara ty badisa i Jesosy, le nandese i fagnahy masigney tan-tane efetse agne reke. Tsy nihinagne reke tagnate ty 40 andro, le nikeré. Niavy amy izay ty Devoly, le nitsapa hevetse aze tie: ‘Naho toe Anan’Andrianagnahare vata’e rehe, le ovao ho mofo ty vato retiagne.’ Tamy ty alala ty Soratse Masigne ty namalea i Jesosy aze tie: ‘Voasoratse tie tsy ty mofo avao ro mahavelogne, fa ty mitsanogne ty saontsy i Jehovah ka.’

Nitsapa hevetse i Jesosy indraike ty Devoly tie: ‘Naho toe Anan’Andrianagnahare vata’e rehe, le mivoagna boake ambone i tempolỳ ey. Fa voasoratse tie hagnirake ty anjeli’e hitsepake azo ty Andrianagnahare.’ Nirehake andinin-teny indraike ty Jesosy tie: ‘Voasoratse tie, ko mitsapa hevetse i Jehovah.’

Naho fa niavy eo, le natoro i Satana aze ty fanjakagne amy ty tontolo toy naho ty voninahi’e vaho ty harena’e, le hoe reke: ‘Homeiko azo iaby reo naho miankohoke amako indraike avao rehe.’ Faie hoe ty Jesosy: ‘Mandehana rehe Satana! Fa voasoratse tie, i Jehovah raike avao ro toko’e hivavaha’o.’

Nandeha amy izay ty Devoly, le nisy anjely nagnomey hanegne ho hane i Jesosy. Nanomboke tamy izay le nitory ty talily soa i Fanjakagney ty Jesosy, fa toe izay ty nagnirahagne aze ho an-tane etoy. Teà o ndatio ty raha nampianare i Jesosy, le norihe iareo avao ze nombà’e.