L’ɔkɔngɔ wa Yeso batizama, nyuma k’ekila kakɔlɔmbɔla otsha l’oswe. Nde kɔndɛ ndooko ɛngɔ l’edja ka nshi 40 ndo akoke ndjala efula. Ko Diabolo akaye ndjohemba Yeso ndo akawotɛ ate: ‘Naka mɛtɛ ɔna Nzambi keyɛ, tɛ ave anɛ dia vɔ mpilɔ mbo ya ndɛ.’ Koko Yeso akokadimola lo nshila Afundelo ɔnɛ: ‘Akafundama dia onto hayala la lɔsɛnɔ la mbo ya ndɛ tsho. Onto pombaka mpokamɛ ɛtɛkɛta tshɛ wata Jehowa.’

Oma laasɔ, Diabolo akadje Yeso tɔfwɛfwɛ ɔnɛ: ‘Naka mɛtɛ ɔna Nzambi keyɛ, fumbɔ oma lo shɔdi ya tɛmpɛlɔ. Akafundama dia Nzambi ayotoma andjelo ande dia ndjokɛmba.’ Koko Yeso akokadimola nto lo nshila Afundelo ɔnɛ: ‘Akafundama dia onto hahombe mbidja Jehowa l’ohemba.’

Ko Satana akɛnya Yeso waolelo tshɛ wa l’andja ɔnɛ, ɛngɔnyi awɔ ndo lotombo lawɔ ndo nde akate ate: ‘Layokosha waolelo anɛ tshɛ ndo lotombo lawɔ naka wɛ tɛmɔlami kaanga mbala ɔtɔi.’ Koko Yeso akakadimola ate: ‘Satana mɔ! Akafundama di’onto pombaka ntɛmɔla paka Jehowa ndamɛ oto.’

Oma laasɔ, Diabolo akamɔ, ko andjelo wakaye ko wakayosha Yeso mbo ya ndɛ. Oma ko etena kɛsɔ, Yeso akasambishaka lokumu l’ɔlɔlɔ la Diolelo. Ɔsɔ mbaki olimu wakandatomama dia ndjosala lanɛ la nkɛtɛ. Anto wakalangaka kɛnɛ kakawaetshaka Yeso ndo vɔ wakoyelaka ahole tshɛ wakandatshɔka.