Tsaʼan yajni yiʼajta jaʼ ja Jesús, ja yip ja Dyos ijiyuj man takin kʼinal. Ja yeʼn mi jas yabʼ 40 kʼakʼu sok ja yuj jelxa waʼin xyabʼi. Anto ti jak ja Dyablo bʼa yajel och probar ja Jesús. Bʼajtan yalyabʼ: «Ta weʼn meran yunina Dyos, alayabʼ ja tonik it apaxuk pan». Pe ja Jesús sjakʼa sok jujuntik yaljelik bʼa Yabʼal Dyos: «Kanel tsʼijbʼunubʼal ja ixuk winik mi malanuk sok waʼelal oj ajyuk sakʼan. Cha tʼilan oj smaklaye spetsanil ja jas wa xyala ja Jyoba».

Jaxa Dyablo ya och probar pilan ekʼele ja Jesús: «Ta weʼn meran yunina Dyos, jipa koʼ abʼaj ja bʼa mas chaʼan ja bʼa templo. Pes tsʼijbʼunubʼal ja Dyos oj sjekon ja yanjelik bʼa oj jak skoltaya». Pe ja Jesús cha sjakʼa soka yaljelik bʼa Yabʼal ja Dyosi: «Kanel tsʼijbʼunubʼal mok wa och probar ja Jyoba».

Anto, ja Satanás cha sjeʼayi spetsanil ja mandaranel ja bʼa luʼumkʼinali soka srikoʼil sok ja stoyjelal, sok yala yabʼ: «Oj kawi spetsanil ja mandaranel it sok ja stoyjelal ta koya mekʼan junta ekʼele ja bʼa stiʼ jsati». Pe ja Jesús sjakʼa: «¡Elan ja il Satanás! Tsʼijbʼunubʼal kechan oja waʼteltay ja Jyoba».

Tixa waj ja Dyablo, sok jakye jujuntik anjel sok yaweyi swaʼel ja Jesús. Tsaʼan, ja Jesús ti kʼe stulyi xcholjel ja lekil rason sbʼaja sGobyerno ja Dyos. Jani jaw ja aʼtel akʼubʼalyi yuja Jyoba bʼa oj skʼuluk ja bʼa luʼumi. Ja ixuk winik jel skʼulane gusto ja jas wa sjeʼa ja Jesús sok wa snochowe ekʼ bʼa chikan bʼaʼa.