Bihain long Jisas i baptais, holi spirit i kisim em i go long ples nating. Em i no kaikai inap 40 de, na em i hangre tru. Bihain Devil i kam long traim Jisas na tok: ‘Sapos tru yu Pikinini Bilong God, tokim ol dispela ston long tanim i kamap bret.’ Tasol Jisas i bekim tok long rot bilong kamapim tok bilong Ol Skripsa: ‘Rait Holi i tok kaikai tasol i no inap givim laip long yu, nogat. Yu mas harim olgeta tok bilong Jehova.’

Bihain, Devil i salensim Jisas: ‘Sapos tru yu pikinini bilong God, orait sanap antap tru long tempel na kalap i go daun. Rait Holi i tok God bai salim ol ensel long ketsim yu.’ Tasol Jisas i kamapim gen tok bilong Ol Skripsa: ‘Rait Holi i tok yu no ken traim Jehova.’

Bihain, Satan i soim Jisas long olgeta kingdom bilong graun na mani na ol nambawan gutpela samting bilong en na tok: ‘Mi bai givim yu olgeta dispela kingdom na ol nambawan gutpela samting sapos yu lotu long mi wanpela taim tasol.’ Tasol Jisas i tok: ‘Satan, yu klia! Rait Holi i tok yu mas lotu long Jehova wanpela tasol.’

Bihain Devil i lusim em, na ol ensel i kam na givim kaikai long Jisas. Kirap long dispela taim, Jisas i autim tok long gutnius bilong Kingdom. Em wok God i salim em i kam long graun long mekim. Ol manmeri i laikim tok Jisas i skulim ol, na ol i bihainim em long olgeta hap em i go.