I muri aˈe i to Iesu bapetizoraa, ua aratai te varua moˈa ia ˈna i te medebara. Aita oia i tamaa aˈe e 40 mahana i te maoro e ua poia roa oia. Ua haere atura te Diabolo ia Iesu ra no te tamata ia ˈna e ua parau atu oia: ‘Mai te peu e e Tamaiti iho â oe na te Atua, a parau i tera mau ofai ia riro mai ei faraoa.’ Ua pahono râ o Iesu ma te faahiti i te mau Papai: ‘Ua papaihia e eita e navai noa te maa no te ora. E titauhia ra ia faaroo i te mau parau atoa a Iehova.’

I muri iho, ua aa te Diabolo ia Iesu: ‘Mai te peu e e Tamaiti iho â oe na te Atua, a ouˈa i raro i te vahi teitei roa o te hiero. Ua papaihia hoi e e tono te Atua i ta ˈna mau melahi no te haru ia oe.’ Ua faahiti faahou â râ o Iesu i te mau Papai a na ô ai e: ‘Ua papaihia e eiaha oe e aa ia Iehova.’

I muri iho, ua faaite o Satani ia Iesu i te mau faatereraa atoa o teie ao, ta ratou mau taoˈa e to ratou hanahana. Ua parau oia: ‘E horoa ˈtu vau ia oe i teie mau faatereraa atoa e to ratou hanahana mai te peu e e haamori oe ia ˈu hoê noa taime.’ Ua pahono atura râ o Iesu: ‘A haere ê oe, Satani! Ua papaihia e o Iehova anaˈe ta oe e haamori.’

I muri iho, ua haere ê te Diabolo e ua haere mai te mau melahi ia Iesu ra no te horoa ˈtu i te maa. Mai tera taime mai â, ua poro Iesu i te parau oaoa o te Faatereraa arii. Ua tonohia mai oia i nia i te fenua no te rave i tera ohipa. Mea au roa na te mau taata ta Iesu mau haapiiraa e ua pee ratou ia ˈna i te mau vahi atoa.