Сугга суктурган соонда ыдыктыг сүлде Иисусту ээн кургаг ховуже эккелген. Иисус 40 хүн дургузунда чүнү-даа чивээн болгаш, аажок аштай берген. Ынчан Эрлик ону күткүп эгелээн: «Сен шынап-ла Бурганның Оглу болзуңза, бо даштарны хлеб кылдыр хуулдурувут» — дээн. Иисус Библияны ажыглап: «Амыдыраарда чүгле аъш-чем-биле эвес, а Иегованың сөзүн дыңнап чурттаары чугула болгай» — деп харыылаан.

Улаштыр Эрлик Иисуска: «Сен шын Бурганның Оглу болзуңза, өргээниң ханаларындан шурай бер. Ынчан Бурган ангелдерин сенче чоргузуптарга, олар сени тудуп алыр» — дээн. Иисус база катап Библияны ажыглап, Бижилгеде Иегованы шеневе деп бижээнин чугаалаан.

Ынчан Эрлик Иисуска делегейниң күрүнелерин, ооң бай-байлакшылын, чаражын көргүскеш: «Сен меңээ оода чаңгыс катап мөгеер болзуңза, бо бүгүнү сеңээ бээр мен» — деп чугаалаан. Иисус: «Ырап чор, Эрлик! Бижилгеде чүгле Иеговага мөгеер деп бижээн болгай» — дээн.

Ооң соонда Эрлик чорупкан, ангелдер Иисуска аъш-чем эккеп берген. Оон бээр Иисус Бурганның Чагыргазының дугайында буянныг медээни улуска суртаалдап эгелээн. Иегованың аңаа дагзып каан даалгазы ол болгай. Иисустуң өөредиин улус дыңнааш, өөрүп, ону эдерип чораан.