Te kʼalal yichʼojix jaʼ-a te Jesuse, ikʼot bael yuʼun te chʼul espiritu ta jochol takin kʼinal. Maʼyuk bin la sweʼ ta 40 kʼajkʼal, jaʼ yuʼun akʼbot bayal wiʼnal. Te Satanás kʼot spas ta prueba te Jesús. Ta sbabial jich la yal: “Teme jaʼatnix-a te sNichʼan te Diose albeya te akʼa skʼatpʼun sba ta pan te tonetik ini”. Pero te Jesús jich la sut te bitʼil tsʼibaybil ta sKʼop Dios: “Jich tsʼibaybil te ma jaʼuknax kuxul ta weʼelil te ants winiketike. Jaʼnix jich ya skʼan ya yaʼiyik te skʼop te Jehovae”.

Te Satanás la spas ta prueba te Jesús ta schebal buelta: “Teme jaʼatnix-a te sNichʼan te Diose, chʼoja koel aba ta stoyolil te temploe. Tsʼibaybil te ya stikun tal chʼul-abatetik yuʼun te Dios swenta ya skoltayat”. Pero te Jesús jich la schaʼsut te bin-utʼil tsʼibaybil ta sKʼop Dios: “Jich tsʼibaybil mame xa apas ta prueba te Jehová”.

Ta slajibal, te Satanás la yakʼbey yil spisil ta chajp nasionetik, te skʼulejal sok te yutsilale, soknix la yalbey: “Yame kakʼbat spisil ini sok te yutsilal teme ya awichʼon ta mukʼ junuknax bueltae”. Pero te Jesús jich la sut: “¡Lokʼan bael Satanás! Jich tsʼibaybil te jaʼnax ya yichʼ ichʼel ta mukʼ te Jehovae”.

Jich yuʼun te Satanás lokʼ bael ta stojol, tal te chʼul-abatetik sok la yakʼbeyik sweʼel te Jesuse. Ta patil-abi, te Jesús kaj ta scholel te lek yachʼil kʼop yuʼun te Wentainele. Jaʼ te aʼtelil-abi te akʼbot spas yuʼun te Jehová liʼ ta Balumilal. Te ants winiketik la smulanik ta bayal te bintik la yakʼ ta nopel te Jesús sok bayuk la stʼunik.