Kʼalal laj xa ox yichʼ voʼ li Jesuse, laj yichʼ ikʼel batel yuʼun chʼul espiritu li ta takixokol balumile. Muʼyuk bu xveʼ 40 kʼakʼal, jaʼ yuʼun solel chviʼnaj tajek. Vaʼun te tal akʼatuk ta preva yuʼun Satanas li Jesuse, xi albate: «Mi ta melel voʼot Xnichʼonot Diose albo ti akʼo kʼatajuk ta pan li tonetik liʼe». Li Jesuse jaʼ jech la stakʼ kʼuchaʼal tsʼibabil ta Vivliae, yuʼun xi la stakʼe: «Xi tsʼibabile: ‹Maʼuk noʼox ta pan kuxul li krixchanoetike, yuʼun skʼan xchikintaik skotol li kʼusi chal Diose›».

Vaʼun li Satanase laj yakʼ ta preva yan velta li Jesuse, xi laj yalbee: «Mi ta melel voʼot Xnichʼonot li Diose, jipo aba yalel li ta temploe, yuʼun xi tsʼibabile: ‹Ta stak talel yaj-anjeltak ta atojolal yoʼ mu kʼusi xanuptane›». Pe xi la stakʼ yan velta li Jesuse: «Xi tsʼibabil xtoke: ‹Mu stakʼ xavakʼ ta preva li Diose avuʼune›».

Ta slajebe, li Satanase laj yakʼbe yil skotol li ajvalilaletik ta balumile xchiʼuk li skʼulejalike, vaʼun xi laj yalbee: «Mi chavichʼun ta mukʼ junuk veltae, chkakʼ aventain skotol liʼe xchiʼuk chkakʼbot li yutsilalike». Pe xi laj yal li Jesuse: «¡Batan Satanas!, yuʼun xi tsʼibabile: ‹Jaʼ noʼox skʼan xavichʼ ta mukʼ li Jeova Dios avuʼune›».

Kʼalal laj xa ox yakʼ ta preva Jesus li Satanase sut batel, vaʼun tal junantik anjeletik yoʼ xakʼbeik sveʼel li Jesuse. Ta tsʼakale lik xcholbe skʼoplal li Ajvalilal yuʼun Diose. Yuʼun jaʼ li abtelal akʼbat spas yuʼun Jeova li Jesuse. Jech xtok, li krixchanoetike toj lek chaʼiik li kʼusi chakʼ ta chanel li Jesuse yuʼun tstsʼakliik batel ti bu chbate.