Nga murahu ha uri Yesu a lovhedzwe, muya mukhethwa wo mu isa sogani. Ho ngo ḽa tshithu lwa maḓuvha a 40, nahone a pfa nḓala vhukuma. Diabolo a ḓa ha Yesu nahone a mu linga a ri: ‘Arali ni Murwa wa Mudzimu zwa vhukuma, vhudzani haya matombo uri a vhe vhurotho.’ Fhedzi Yesu a fhindula a tshi shumisa Maṅwalo, a ri: ‘Ho ṅwalwa u pfi muthu ha tshili nga zwiḽiwa fhedzi. U fanela u thetshelesa zwoṱhe zwine Yehova a zwi amba.’

Diabolo a dovha a linga Yesu a ri: ‘Arali ni Murwa wa Mudzimu, ḓiposeni u bva nṱha-nṱha ha ṱhanga ya thembele. Ho ṅwalwa u pfi Mudzimu u ḓo laedza vharuṅwa vhawe uri vha ni gavhe.’ Fhedzi Yesu a dovha a amba zwi re Maṅwaloni a ri: ‘Ho ṅwaliwa u pfi ni songo linga Yehova.’

Nga murahu, Sathane a sumbedza Yesu mivhuso yoṱhe ya shango na vhugala hayo a ri: ‘Hezwi zwoṱhe ndi ḓo ni ṋea arali na nthabela luthihi fhedzi.’ Fhedzi Yesu a fhindula a ri: ‘Ṱuwani Sathane! Ho ṅwalwa u pfi ni fanela u rabela Yehova fhedzi.’

Diabolo a mbo ṱuwa, nahone vharuṅwa vha ḓa vha fha Yesu zwiḽiwa a ḽa. U bva nga tshenetsho tshifhinga, Yesu a huwelela mafhungo maḓifha a Muvhuso. Wo vha u wone mushumo we a rumiwa uri a u ite kha ḽifhasi. Vhathu vho funa zwe Yesu a vha funza, nahone vha mu tevhela hoṱhe he a ya hone.