Nuumala Yesu obatiziwa, munepa wootteela waahimurowana moothakoni. Yesu aahimaliha mahiku 40 ohilyiiye etthu, ni aahivoliwa etala vanceene. Nto Diabo aahirwa omweehererya Yesu, oriki: ‘Mwaari Mwaana a Muluku, murume maluku ala ethatuwe ephaawu’. Yesu aahimwaakhula oromolaka Soolempwa ohimyaka so: ‘Voolempwa wira: Khahiyo eyoolya paahi envaha okumi. Mutthu ohaana wiiwelela moolumo othene a Yehova’.

Nuumala-vo, Diabo aahimwiirela Yesu: ‘Nyuwo, mwaari Mwaana a Muluku, mutuphe vasulu va etemplo, maana voolempwa wira: Muluku onooruma malaikha awe yookaphuleni’. Yesu aahiromola-tho Soolempwa ohimyaka so: ‘Voolempwa wira: Muhimweehererye Yehova Muluku anyu’.

Moottharelana, Satana aahimooniherya Yesu omwene wotheene wa mulaponi ni mihakhu saya vamosa ni ovuwa waya. Nto aahimwiirela so: ‘Mwakikokhorela ekwaha emosa paahi, kinimoovahani omwene ola wotheene’. Yesu aahimwaakhula wira: ‘Khuma-va, Satana! Voolempwa wira: Muhaana omukokhorela Yehova paahi’.

Vano Diabo aahikhuma opuro ole, nuumala-vo yaahirwa malaikha khunvaha Yesu eyoolya. Okhuma nihiku nle, Yesu aanilaleya ihapari sooreera sa Omwene wa Muluku. Owo ti waari muteko aarwenle awe valaponi. Atthu yaanisiveliwa ni itthu Yesu aawiixuttiha awe, ni yaanimutthara khula opuro aarowa awe.