Katapos mabawtismohan hi Jesus, gin-giyahan hiya han baraan nga espiritu ngadto ha kamingawan. Waray hiya kumaon ha sulod hin 40 ka adlaw salit nagutom gud hiya. Tapos, an Yawa umabot ngan ginsulay hi Jesus ngan nagsiring: ‘Kon Anak ka gud han Dios, himoa nga tinapay ini nga mga bato.’ Pero hi Jesus binaton pinaagi ha pagkotar ha Kasuratan: ‘Nahisurat nga diri la tinapay an ginkikinahanglan basi ka mabuhi. Kinahanglan mamati ka ha tagsa nga pulong nga ginsisiring ni Jehova.’

Kahuman, ginsulay utro hi Jesus han Yawa: ‘Kon Anak ka gud han Dios, layog tikang ha pinakahitaas nga bahin han templo. Kay nahisurat nga an Dios magsusugo hin mga anghel basi saluhon ka.’ Pero ginkotar utro ni Jesus an Kasuratan: ‘Nahisurat nga diri mo sadang sarihan hi Jehova.’

Tapos, iginpakita ni Satanas kan Jesus an ngatanan nga ginhadian han kalibotan ngan an karikohan ngan an himaya hito ngan nagsiring: ‘Ihahatag ko ha imo ini ngatanan nga ginhadian ngan an himaya hito kon magsisingba ka ha akon bisan makausa la.’ Pero hi Jesus binaton: ‘Iwas Satanas! Nahisurat nga hi Jehova la an kinahanglan mo singbahon.’

Katapos, an Yawa bumaya ngan inabot an mga anghel ngan naghatag hin pagkaon kan Jesus. Tikang hito, iginsangyaw ni Jesus an maopay nga sumat han Ginhadian. Ginsugo hiya nganhi ha tuna basi himoon ito nga buruhaton. Naruyagan gud han mga tawo an iya igintutdo ha ira, ngan nagsinunod hira ha iya bisan ngain hiya kumadto.