ISIFUNDO 75
UMtyholi Ulinga UYesu
Emva kokuba uYesu ebhaptiziwe, umoya oyingcwele wamthumela entlango. Walamba kuba zange atye iintsuku eziyi-40. UMtyholi waya kumlinga uYesu, wathi: ‘Ukuba nyhani unguNyana kaThixo, jika la matye abe zizonka.’ UYesu wamphendula wathi: ‘IZibhalo zithi umntu akaphili ngokutya kodwa. Kufuneka amamele konke oko kuthethwa nguYehova.’
Waphinda uMtyholi wathi kuYesu: ‘Ukuba nyhani unguNyana kaThixo, yiya phezulu etempileni uze uziphose phantsi. Izibhalo zithi uThixo uza kuthumela iingelosi ukuba zikugange.’ UYesu wamphendula wathi: ‘IZibhalo zithi ungaze umlinge uYehova.’
USathana wabonisa uYesu zonke izikumkani zomhlaba, ubutyebi nozuko lwazo waza wathi: ‘Ndiza kukunika zonke ezi zinto ukuba nje unokuqubuda kum.’ UYesu waphendula wathi: ‘Hamb’ umke, Sathana! Izibhalo zithi kufanele kunqulwe uYehova kuphela.’
UMtyholi wahamba, zaza iingelosi zanika uYesu ukutya. Ukususela ngoko, uYesu washumayela iindaba ezilungileyo zoBukumkani. Wayethunyelwe apha emhlabeni ukuba enze kanye loo msebenzi. Abantu babezithanda izinto awayezifundisa, bemlandela naphi na apho aya khona.
“Xa [uMtyholi] ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.”—Yohane 8:44
Mhlawumbi Ungayithanda Nale
UYESU—INDLELA, INYANISO, UBOMI
Funda Kwindlela UYesu Awamelana Ngayo Nezilingo
Izilingo uYesu awalingwa ngazo zisixelela izinto ezimbini ngoMtyholi.
FUNDA KUMFUNDISI OMKHULU
Kufuneka Sizixhathise Izilingo
Umele wenze ntoni xa umntu esithi yenza into engalunganga?
IZINTO EZENZIWA XA KUFUNDWA IBHAYIBHILE
Indlela Yokuxhathisa Isilingo
Xa uYosefu wayelingelwa ukuziphatha kakubi, yintoni eyabangela ukuba enze okulungileyo?
