Yesu ali abatiswe, msimu weswela wamlongolele kucipululu. Jwalakwe nganalya cilicose kwa masiku 40, mwamti jamkwete mnope sala. Kaneko Satana jwayice kwa Yesu kukumlinga. Ni jwatite, ‘Naga mli mwanace jwa Mlungu, mgalamule magangaga kuti gaŵe mkate.’ Nambo Yesu jwajanjile mwakamula malemba kuti, ‘Malemba gakusati mundu kuti aŵe ni umi pakusasosekwa yejinji ngaŵa yakulyape. Mkusosekwa kupikanila maloŵe galigose gakopoka mkamwa mwa Yehofa.’

Kaneko Satana ŵamlinjilesoni Yesu kuti, ‘Naga mli mwanace jwa Mlungu, mligwisye pasi kutyocela penani pa nyumba ja Mlungu. Pakuŵa kulembedwe kuti Mlungu cacitumisya malayika gakwe kukumjangata kuti mkagunda pasi.’ Nambo Yesu jwajanjile mwakamula malembasoni kuti, ‘Kulembedwe kuti mkamlingaga Yehofa.’

Kaneko Satana ŵamlosisye Yesu maucimwene gosope ga pacilambo capasi soni yipanje yakwe ni ucimbicimbi. Kaneko jwatite, ‘Cinjimpa maucimwene gosopega soni ucimbicimbi wakwe naga mkundindiŵalila kamope basi.’ Nambo Yesu ŵamjanjile kuti, ‘Mtyoce apa, Satana! Kulembedwe kuti mkusosekwa kumlambila Yehofa jika basi.’

Pambesi pakwe Satana jwamlesile, kaneko malayika gayice kukumtumicila Yesu. Kutandila pelepo, Yesu jwatandite kulalicila ngani syambone sya Ucimwene. Galiji masengo gaŵamtumile kukutenda pacilambo capasi. Ŵandu ŵanonyelaga yaŵajiganyaga Yesu, mwamti ŵamkuyaga kuli kose kuŵajawulaga.