Ka tsʼoʼok u yokjaʼ Jesuseʼ, bisaʼab teʼ desierto tumen le kiliʼich muukʼoʼ. Maʼ tu jaantaj mix baʼal ich 40 kʼiinoʼobiʼ, le oʼolal jach wiʼijchaji. Le Kʼaasilbaʼal túunoʼ tu túuntaj u yóol Jesús. Yáaxeʼ tu yaʼalajtiʼ: ‹Wa u paalech Dioseʼ, aʼal ka suunak waajil le tuunichoʼobaʼ›. Chéen baʼaleʼ Jesuseʼ tu yaʼalajtiʼ baʼax ku yaʼalik le Kiliʼich Tsʼíiboʼoboʼ: ‹Tsʼíibtaʼaneʼ maʼ chéen yéetel waaj unaj u kuxtal wíinikiʼ. Kʼaʼabéet xan u yuʼubik máak tuláakal baʼax ku yaʼalik Jéeoba›.

Le Kʼaasilbaʼaloʼ tu kaʼa túuntaj u yóol Jesús, tu yaʼalajtiʼ: ‹Wa u paalech Dioseʼ pulaba kabal, tumen tsʼíibtaʼaneʼ yaan u yaʼalik tiʼ u angeloʼob ka u kanáantechoʼob›. Chéen baʼaleʼ Jesuseʼ tu kaʼa aʼalajtiʼ baʼax ku yaʼalik le Kiliʼich Tsʼíiboʼoboʼ: ‹Tsʼíibtaʼaneʼ maʼ unaj a túuntik u yóol Jéeoba a Diosiʼ›.

Tu tsʼookeʼ Satanaseʼ tu yeʼesaj tiʼ Jesús tuláakal u reinoiloʼob yóokʼol kaab bey xan u nojbeʼeniloʼob, ka tu yaʼalajtiʼ: ‹Yaan in tsʼáaiktech tuláakal le baʼaloʼobaʼ wa ka xoltal a adorarten kex chéen juntéen›. Chéen baʼaleʼ Jesuseʼ tu núukajtiʼ: ‹¡Xeen, Satanás! Tsʼíibtaʼaneʼ chéen Jéeoba unaj u adorartaʼal›.

Le Kʼaasilbaʼaloʼ bini, ka taal jujuntúul angeloʼob u tsʼáaʼob baʼax kʼaʼabéet tiʼ Jesús. Ka tsʼoʼokeʼ Jesuseʼ káaj u kʼaʼaytik le baʼaxoʼob jatsʼutstak ken u beet le Reinooʼ. Letiʼe meyaj kʼubéentaʼabtiʼ tumen Jéeoba ka u beet way Luʼumeʼ. Le máakoʼoboʼ uts tu tʼaan kaʼach u yuʼubikoʼob le baʼax ku kaʼansik Jesusoʼ, le oʼolal joʼopʼ u binoʼob tu paach.