Despué de guyuunisa Jesús, yené espíritu santu laabe lu desiertu. Cumu qué ñobe gastiʼ 40 dxi la? guizáʼ candaanabe. Ngue runi guyé Binidxabaʼ yeguni tentar laabe. Primé la? gudxi laabe: «Pa dxandíʼ xiiñiʼ Dios lii la? gudxi ca guié ca gácacaʼ pan». Peru Jesús bicabi laabe né ni cá lu Xquiʼchi Dios: «Maca cá cadi de guendaró si nga zanda guibani binni. Laaca naquiiñeʼ gucaadiágacabe guiráʼ ni ná Jiobá».

Bibiguetaʼ biʼniʼ tentar Binidxabaʼ Jesús: «Pa dxandíʼ xiiñiʼ Dios lii la? gudxiʼbaʼ dede ra jma nasoo templu ca ne guyuubí. Maca cá zuseendaʼ Dios ca ángel stiʼ para gulá lii». Peru Jesús bicabi laabe sti biaje né ni cá lu Xquiʼchi Dios: «Maca cá cadi naquiiñeʼ guinábacabe xiixa Jiobá para quitesícabe laa».

Últimu la? biluíʼ Binidxabaʼ laabe guiráʼ ca reinu nuu ndaaniʼ Guidxilayú né ca cosa risaca stícani ne gudxi laabe: «Zudieeʼ lii guiráʼ ca reinu riʼ pa guni adorarluʼ naa neca ti biaje si». Peru bicabi Jesús laabe: «¡Biree de ra nuaaʼ Binidxabaʼ! Maca cá Jiobá si nga naquiiñeʼ gaca adorar».

Biree si Binidxabaʼ zeʼ, guyé caadxi ángel ra nuu Jesús ne bidiicaʼ ni gudobe. Despué de ngue, bizulú biʼniʼ predicar Jesús ca noticia galán stiʼ Reinu. Purtiʼ nga nga dxiiñaʼ bidii Jiobá laabe gúnibe ndaaniʼ Guidxilayú riʼ. Guizáʼ guyuulaʼdxiʼ ca binni que guiráʼ ni bisiidiʼ Jesús, ne yenándacaʼ laabe guiráʼ ladu guyebe.