Tingbafuo Yesu zi bapatiza, ziazia toro angbe fuko kumbatayo ku ngbakungba yo. Gomoro amangiko ni kerehe mbiko tipa aˈuru 40, ko aaringa he te. Sidu, Bakitingbanga aye ka asada Yesu ki ya fuko: ‘Ka si du nga wiri Mbori du nzunzu nga mo, mo ya fu gi mbia re si satihe ni kpakuto.’ Ono Yesu akaragapai ni mangako sunge na Ziazia Kekeapai ki ya: ‘Si ni kekehe nga anga kina riahe sa boro araka mbikoho te. Si naida boro gi agu apai dunduko Yekova agumbaha.’

Fuoho, Bakitingbanga aˈasadi Yesu ki ya: ‘Ka si du nga wiri Mbori du nzunzu nga mo, mo gu rii ngbaõ gi yekaru re ki gito kusande. Si ni kekehe nga Mbori akeda gako amaraika i ye ka banda ro.’ Ono Yesu amangisunge berewe na Ziazia Kekeapai nga: ‘Si ni kekehe nga ka mo asadinga Yekova ya.’

Sidu, Satana ayugu agu akindo nga ga zegino naabaha fu Yesu na gaha akumuko gbiati gaha taarimo ki ya: ‘Ka mo irisi re kandara bara sa, mi nika fu agi akindo re naabaha foro na gaha taarimo.’ Ono Yesu akaragapai ki ya: ‘Satana, mo guari kusayo! Si ni kekehe ya kina Yekova sa si aida i irisiko.’

Fuoho, Bakitingbanga aguari kusayo, na amaraika ki ye na riahe fu Yesu ko rihe. Naatona ti gu regbo re kaa ndu kumbatayo, Yesu atungusi gu wene pangbanga nga ga Kindo. Si nangia gu sunge i akedi ko ku auru kpotosende no ko mangihe. Aboro aima kpinyemu gupai Yesu aayugoho fuyo, na i kini pekefuo ko ku rogo agu aba ko aandu ku rogoho.