Fafisu anya paik April taun 30 M, Yesus rya ḇe Yerusalem. Snonkaku sibor srama ḇe mnu ani fa sakso ras Paskah. Ro ras ani, sḇuk farsarser aiwan ro bait. Sino sisya sun aiwan sesya kwar, ḇape ḇesesya sape skowesna ro Yerusalem.

Fafisu Yesus rya ḇe bait, myam snonkaku sya sḇoḇ aiwan sya. Sisewar pipi ro moḇ sḇuk farsamsyom ḇe Yahwe I! Yesus imsor kaku. Duf kaḇrai oso ramnai iyaw domba ma sapi sya ro bait dori. Pyambar meja sikfadwer pipi ma isawen pipi logam sesya ro saprop. Yesus ikofen ḇe ḇeḇoḇ manjawa ansya, ’Mkun nakam ḇe ḇondi! Mkofrur Mami yedi rum ḇyedine ḇe moḇ ḇeḇaḇoḇ awer!’

 Snonkaku ḇero bait sya smanen kaku rosai Yesus ifrur nane. Manfamyan ḇyesi siswarepen ḇeri nabi oso wos ḇyena kuker Mesias i, ’Nari yaswar kaku faro Yahwe rum ḇyedi.’

Ramnai ro taun 33 M, Yesus iyaw ḇeḇaḇoḇ ro bait sya wer. Imewer kaku snonkaku sya skoryaye Mami rum ḇyedi.