Vbe ẹghẹ ne emwa nibun ya gha rrie Jerusalẹm ne iran ya do Ugie Alagberra vbe ukpo 30 C.E., Jesus na vbe gha khian. Abọ ọkpa vbe ugie na, keghi re izọese ọghe aranmwẹ na ru vbe ọgua Osa. Emwa eso na viọ aranmwẹ lele egbe rre, vbene eso na do dẹ vbe Jerusalẹm.

Vbe Jesu ghi sẹ ọgua Osa, ọ na do bẹghe ẹre wẹẹ emwa khiẹn aranmwẹ vba. Iran na gha khuan igho vbe owa ugamwẹ ọghe Jehova! Vbe Jesu a ghi ru? Ọ na ya asan khulo avbe ohuan kevbe ẹmila ne iran ghaa khiẹn hin ọgua Osa rre. Ọ na mu eteburu ọghe emwa ni fian igho gbotọ. Jesu keghi tama iran ni ghaa khiẹn idu wẹẹ: ‘Wa viọ ena hia hin emwa rre! Uwa ghẹ ya owa Erha mwẹ khian ehe ne a na do ẹki!’

 Emwa hia ni ghaa rre ọgua Osa vbe ẹdẹrriọ na yan unu ruan. Erhuanegbe Jesu keghi yerre ẹmwẹ akhasẹ na tae vbekpa e Mezaia, nọ khare wẹẹ: ‘Te I khian wa ya ekhọe hia gha mwẹ izọghae ye emwi ke emwi nọ dekaan owa ọghe Jehova.’

Vbe ọ ghi rre ukpo 33 C.E., Jesu na werriegbe kpe ọgua Osa huan. Ọ ma kue ne ọmwa rhọkpa ya aro tila owa Erhae rua.