Ku uputukilo wa mwaka 30 M.J., Yesu yaya ku Yerusaleme. Atu anji te kakwiza mu mbonge yacho hanga alinge chiwanyino cha Chizomboka. Ha chiwanyino chacho, ayo te kakuhana milambu ya yimuna mu tembele. Atu amwe te kakwiza ni yimuna yo, alioze akwo te kakuyilanjila mu Yerusaleme.

Muze Yesu ayile mu tembele, aye kamwene atu kanalanjishilamo yimuna. Ayo te kakulingila mingoso yo mu zuwo lia uwayilo wa Yehova! Kuchi Yesu evwile? Iye yalinga yimwe shikote ya mihipu ni kutuhwisa haze lia tembele pembe ni mapanga. Yalimbula meza ja akwa-kusumbakenya mbongo ni kumwanga  mbongo jo hashi. Yesu yalweza waze te analanjisa membe ngwenyi: ‘Tuhwisenu yuma yeswayi haze! Kunwatambile kupwisa zuwo lia Tata chihela cha mingoso!’

Atu mu tembele yakomoka ha yize Yesu alingile. Tumbaji twenyi yewuluka uprofeto hakutwala kuli Mesaya ngwenyi: ‘Mungukazala too ni zango ha zuwo lia Yehova.’

Kulutwe, ha mwaka 33 M.J., Yesu yapemesa tembele kamuchiali. Iye te kechi kwecha niumwe hanga ahone vumbi mu zuwo lia Tato.