KALANSEN 76
Yezu be Alabatosoba saniya
Saan 30 tuma na, awirilikalo fan fɛ, Yezu tagara Zeruzalɛmu. Mɔgɔ caaman tun nana Tɛmɛnkan seli kɛ. U ye bɛgɛnw saraka Alabatosoba kɔnɔ i ko a be deli ka kɛ cogo min na o seli la. Dɔw tagara ni bɛgɛnw ye, nka dɔ wɛrɛw y’u san Zeruzalɛmu.
Yezu tagara Alabatosoba kɔnɔ ani a y’a ye ko mɔgɔw be bɛgɛnw feerela o yɔrɔ la. U tun be wari ɲinina Jehova batoso yɛrɛ kɔnɔ! Yezu ye mun kɛ do? A ye juru kɛ busan ye ka bɛgɛnw gwɛn ka bɔ Alabatosoba kɔnɔ. A ye warifalenbagaw ka tabaliw ɲɔndi ka ben ani k’u ka warimisɛnw yɛrɛkɛ duguma. Minw tun be tuganinw feerela, Yezu y’a fɔ u ye ko: ‘ A’ ye minan nunu cɛ ka bɔ yan! Aw kana ne Faa ka soo kɛ wari ɲiniyɔrɔ ye!’
Yezu ye min kɛ, o ye mɔgɔw kabakoya Alabatosoba kɔnɔ. A ka kalandenw hakili jigira kiraya kuma nin na, min ɲɛsinna Masiya ma: ‘I ka soo koo ka gwɛlɛ ne ma haali.’
Kɔfɛ, saan 33 wagati la, Yezu ye Alabatosoba saniya a siɲɛ filanan na. A tun t’a fɛ mɔgɔ si ka a Faa ka soo mafiɲɛya.
“Aw te se ka nafolo kanu, ka baara kɛ Ala ye fana.”—Luka 16:13
Découvrez aussi…
YEZU: ALE LO YE SIRA, TIƝƐN, ANI ƝƐNAMAYA YE
Yezu kisɛyanin lo tiɲɛn batoli koo la
Ala ka sariya tun ye sira di Israɛldenw ma ka bɛgɛnw san Zeruzalɛmu walisa k’u saraka. N’o lo, mun na Yezu ye jagokɛlaw ye Alabatoso kɔnɔ tuma min na, a dimina?
