Jesus ama aka Jerusalem ke n̄kpọ nte April ke isua 30 C.E. Ediwak owo ẹma ẹdi usọrọ Passover ke Jerusalem isua oro. Mmọ ẹma ẹwa uwa ẹnọ Abasi ke ini usọrọ oro. Ndusụk mmọ ẹkedada ufene ẹto obio mmọ ẹdi, edi mbon eken ẹkedidep eke mmọ ke Jerusalem.

Ke ini Jesus odụkde temple, enye ama okụt mme owo ẹnyamde ufene do. Mmọ ẹma ẹda temple Jehovah ẹnịm itie un̄wana okụk. Nso ke Jesus akanam mmọ? Enye ama ada urụk anam ikpa ada ebịn erọn̄ ye enan̄ mmọ osion̄o ke temple, onụk okpokoro mme okpụhọ okụk ọduọn̄ọ, onyụn̄ asuan okụk mmọ ke isọn̄.  Jesus ama ọdọhọ mbon oro ẹkenyamde ibiom ete: ‘Ẹtan̄ n̄kpọ emi ẹkpọn̄ mi! Ẹkûda ufọk Ete mi ẹnyam urua!’

Idem ama akpa mbon emi ẹkedude ke temple, esịt onyụn̄ ayat ndusụk mmọ. Mme mbet esie ẹma ẹti ke prọfesi kiet emi aban̄ade Messiah ọkọdọhọ ete: ‘Ifịk ufọk fo ayadia mi idem.’

Jesus ama afiak anam ukem n̄kpọ emi ke isua 33 C.E. Enye ikenyịmeke owo ndomokiet ada ufọk Ete esie anam se amama.