Im Früehlig vom Jahr 30 gaht Jesus uf Jerusalem. Vil Lüt sind i d Stadt cho, zum s Passahfescht z fiire. Es ghört zum Fescht dezue, dass mer im Tempel Tier tuet opfere. Di einte Lüt bringed ihri Tier selber mit und anderi chaufed si z Jerusalem.

Wo Jesus i Tempel inechunnt, gseht er, wie dört Tier verchauft werded. D Verchäufer sind nume im Huus vo Jehova zum Geld z verdiene und nid zum Jehova azbete. Wie reagiert echt Jesus? Er macht sich us Seili e Peitsche und jagt d Schaf und d Rinder us em Tempel use. Nachher gheit er d Tisch vo de Geldwechsler um und rüehrt ihri Münze uf de Bode. Und zu de Tuubeverchäufer seit er: «Weg mit dem Züüg! Höred uf, s Huus vo mim Vater zumene Määrtplatz z mache!»

D Mensche, wo im Tempel sind, sind ganz überrascht. Aber de Jünger vo Jesus chunnt e Prophezeiig über de Messias in Sinn, wo heisst: «Ich wird mich voll für s Huus vo Jehova iisetze.»

Später, im Jahr 33, jagt Jesus d Händler es zweits Mal us em Tempel use. Er luegt nämlich nid eifach zue, wenn öpper kei Reschpekt zeigt vor em Huus vo sim Vater.