Abrílrupi, pe áño 30-pe, Jesús oho Jerusalénpe. Upérõ hetaiterei hénte oho avei upe siudápe ofesteha hag̃ua pe Páskua. Upe fiésta jave, pe témplope ojesakrifikámi vaʼerã animál kómo ofrénda Jehovápe g̃uarã. Oĩ oraháva voi umi animál omeʼẽtava kómo ofrénda ha oĩ umi ojoguántemava Jerusaléngui.

Jesús og̃uahẽvo pe témplope, ohecha oĩha upépe ovendéva umi animál ojepuru hag̃ua kómo ofrénda. Jesús ipochyeterei ohechávo ojejapoha negósio Jehová rógape. Upémarõ ojagarra peteĩ pióla ha omondýi umi ovecha ha vakakuéra pe témplogui. Upéi otumbapa umi kambistakuéra mesa ha umi imonedakuéra isarambipa pe yvýre. Jesús heʼi  umi palóma vendehápe: “¡Peipeʼa koʼã mbaʼe koʼágui! ¡Che Túa róga ndahaʼéi merkádo!”.

Umi hénte oĩva pe témplope oñesorprende ohechávo la Jesús ojapóva. Idisipulokuéra katu imanduʼa pe profesía oñeʼẽva pe Mesíasre ha heʼíva: “Ahayhuetereíta Jehová róga”.

Upéi, áño 33-pe Jesús ojapo jey la mísma kósa ohechauka hag̃ua omombaʼeha pe témplo. Haʼe oipota vaʼekue enterovéva orrespeta ha omombaʼe Itúa róga.