Momueze ape April nao wombura ndji 30 O.Z., Jesus wa ya koJerusalem. Ovandu ovengi ve ya kotjihuro kOpaska. Otjorupa romukandi, owo va tjita ozombunguhiro zovinamuinyo pOndjuwo Ondjapuke yaMuhona. Ovandu tjiva va eterera ovinamuinyo, posiya varwe ve yekuranda moJerusalem.

Indu Jesus tja hita mOndjuwo Ondjapuke yaMuhona, eye wa muna ovandu mbaave randisire mo ovinamuinyo. Owo aave randisasana oviṋa mondjuwo yaJehova yomerikotameneno! Jesus wa tjita vi? Eye wa ungura ongora pozongoze na ramba ozonḓu nozongombe mOndjuwo  Ondjapuke yaMuhona. Eye wa tjengura ovitihe vyovarandise na imbirahi ovimariva. Jesus wa raera imba mbaave randisa ozonguti na tja: ‘Pitiseye oviṋa mbi! A mu tjiti Ondjuwo yaTate oruveze romarandisiro!’

Ovandu pOndjuwo Ondjapuke yaMuhona va himisirwe i oviṋa Jesus mbya tjita. Ovahongewa ve va zemburuka omaprofetero ohunga na Messias nge tja: “Oupyuke kondjuwo yoye, Ndjambi, u ndji seseta otja omuriro.”

Kombunda mombura ndji 33 O.Z., Jesus wina wa kohorora Ondjuwo Ondjapuke yaMuhona otjikando otjitjavari. Eye kena pa yandjera omundu ngamwa auhe okuzunḓa ondjuwo yaIhe.