Insay di ia 30 afta Krays, Jizɔs go na Jerusɛlɛm. Bɔku pipul dɛn kam na di siti fɔ di Pasova. Dɛn mek animal sakrifays dɛn as pat pan di sɛlibreshɔn. Sɔm pipul dɛn kam wit animal dɛn bɔt ɔda wan dɛn bay animal na Jerusɛlɛm.

We Jizɔs go na di tɛmpul, i si pipul dɛn de sɛl animal dɛn de. Dɛn bin de mek mɔni fɔ dɛnsɛf insay Jiova in os! Wetin Jizɔs bin du? Jizɔs yuz rop dɛn fɔ mek ken ɛn drɛb di ship ɛn kaw dɛn kɔmɔt na di tɛmpul. I trowe di wan dɛn we de chenj mɔni dɛn tebul dɛn ɛn dɛn mɔni dɛn na grɔn. Jizɔs tɛl di wan dɛn we de sɛl dɔv dɛn se: ‘Una pul dɛn tin dɛn ya kɔmɔt na ya! Una nɔ mek mi Papa in os as ples fɔ du biznɛs!’

 Pipul dɛn na di tɛmpul kɔle we dɛn si wetin Jizɔs du. In disaypul dɛn mɛmba di prɔfɛsi bɔt di Mɛsaya we se: ‘A go gɛt zil fɔ Jiova in os.’

Leta insay di ia 33 afta Krays, Jizɔs klin di tɛmpul fɔ di sɛkɔn tɛm. I nɔ go alaw ɛnibɔdi fɔ sho se i nɔ rɛspɛkt in Papa in os.